娛樂專題：「翻版千語」陳嘉莉尋愛物色「林峯」

20140522
  • 東網電視
    更多新聞短片
    陳嘉莉被指貌似吳千語。
    模特兒陳嘉莉（Kelly）去年來港發展，成為名模Mandy Lieu師妹。雖然入行不久，但她曾與Angelababy及彭于晏等合作，更有幸與湯唯作零距離接觸，令她喜出望外！外貌與吳千語有幾分相似的她，笑稱希望可覓得專屬的「林峯」，但首要條件是有上進心。
    遇零架子湯唯
    來自廣州的Kelly，中學時獲星探發掘成為兼職模特兒，去年來港發展並成為名模Mandy Lieu師妹，展開全職模特兒生涯。雖然入行資歷尚淺，但她曾與Angelababy、高圓圓及彭于晏等合作，當中最令Kelly 難忘的是巧遇湯唯作零距離接觸：「嗰次我同高圓圓拍廣告，喺髮型屋整頭時竟然撞到湯唯，佢仲同我分享工作經驗，覺得佢零架子，好有上進心！」
    學習對象
    Kelly眼大大兼留有一頭長髮，驟眼望上去與同是模特兒的吳千語有幾分相似，她笑說：「身邊嘅朋友、同事都話似，我唔覺，但覺得吳千語個樣好甜、可愛同優雅，會以佢為學習對象。」
    吳千語有男友林峯，問到單身的Kelly會否想找個似足林峯的完美男友？她說：「搵到愛人係一件幸福嘅事，如果咁幸運搵到當然開心。（ 擇偶條件？）有上進心，事業比我強，唔一定靚仔，最緊要合眼緣。」
    目標進軍影壇
    雖然現時要離鄉別井全力在港發展，但她指讀書時已不時中港兩邊走，對香港並不陌生：「有親戚喺度住，我以前讀書時都成日嚟，已經好熟路。（覺得香港點？）好有動力，大家做嘢好有效率，所以我唔可以懶，工作時變得積極。最開心係香港購物同交通都方便，所以我成日出街，唔怕悶親。」
    談到未來工作大計，Kelly表示會專注發展模特兒工作，並希望進修自我增值：「講嘢唔叻，想練吓說話技巧。我想學多幾種語言，方便第時去唔同國家做嘢溝通。」
    另外，她希望可拍攝電影，但明白不能一步登天：「入咗行唔係好耐，有機會都想拍吓微電影先，電影遲啲先算。（會請教師姐Mandy Lieu ？）有機會都想，但佢太忙，惟有自己睇多啲電影同書先。」
    嗒老火靚湯嫩肌
    獨居的陳嘉莉煮得一手「住家菜」，平日不用開工時，必定會落廚照顧五臟六腑，當中最拿手的是煲老火湯：「煮家常小菜都冇乜問題，最叻就係煲湯，可以一煲搞掂晒，仲可以調理身體同滋潤皮膚。平時一得閒就會煲湯飲，有時仲會請埋公司同事飲添！」
    Profile
    姓名：陳嘉莉（Kelly）
    年齡：18歲
    身高：1米70
    背景： 中學時獲星探發掘成為兼職模特兒，去年來港發展做Mandy Lieu師妹，全力發展模特兒事業。