娛樂專題：囡囡撐復出　李麗珍做足100分媽咪

活了近半個世紀，昔日女神李麗珍的人生並不平凡。10 多年前成為單親母親的她，肩負起養育女兒的重任，雖然甚少下廚，但不惜於早上6時起床為愛女準備飯盒，多年來管接管送，風雨不改，盡力做足100 分。感情路上，她與潘源良分離後再走在一起，但可能因感情經歷豐富，令她對結婚沒有太大感覺︰「等男友得閒。」女神變師奶，但她似乎早已習慣︰「咁多年慣咗咁上下。」更指未嘗戀愛滋味的女兒同樣渴望平凡的愛情：「佢唔鍾意富二代。」似乎其甘於平凡的性格亦遺傳了給愛女。

最近有不少昔日女神回歸娛樂圈拍劇，除了「小龍女」李若彤外，更有70、80後男生最愛的李麗珍。現年48歲的珍妹可說是90年代的娛樂圈標誌，她擁有甜美外貌及索爆身材，甫出道已贏在起跑線。其電影作品經典，感情生活亦不平凡，或多或少是觀眾部分成長回憶。

母兼父職 為女兒推Job

1996年，珍妹與前夫許愿結婚成為熱話，更被外界形容為「美女與野獸」。兩人婚後育有女兒許倚榕，惟四年後離婚收場，珍妹自此母兼父職，獨力照顧女兒。由女神變成育有一女的師奶，她坦言當時很辛苦︰「囡囡讀小學嗰時未得閒過，又要煮嘢食，又要接放學，放假又要去海洋公園同迪士尼，好忙！」問到為女兒可以去到幾盡？視囡囡為心肝寶貝的她直言，囡囡只需說一句話，哪怕是放棄工作機會，她亦會立即做︰「我少煮飯，通常出去食，但以前囡囡返學話要帶飯，我咪就吓佢，每朝6點起身煮飯，所以要揀假期、佢唔使返學嘅日子做活動，最遲星期一就要返嚟。」

問到女兒小時候可有問起爸爸？她說︰「佢哋耐唔耐會見吓，其實囡囡都知嘅，細細個已經面對呢樣嘢。」有指在單親家庭長大的小孩，最怕看見同學有完整家庭，以免因羨慕而感不快或埋怨父母，幸而珍妹未有遇到這種情況。無獨有偶，女兒不少同學都在單親家庭長大，珍妹說︰「佢好多同學嘅父母都係分開，有需要先見面，我覺得咁都幾好，好過聽到啲同學話父母成日嗌交，咁咪仲唔開心！」

嚴選女婿 富二代No Way

轉眼間女兒已17歲，長得亭亭玉立，不少星二代都會行父母舊路，但珍妹強調女兒無意入行：「囡囡未決定大個做乜，但對呢行冇乜興趣，我唔會逼佢。佢唔鍾意喺屋企，鍾意多朋友，我諗佢鍾意做團體工作多啲。」問到踏入青春期的女兒可有拍拖？她說︰「暫時未，可能讀女校機會少啲，但我講咗：『拍拖時我幫你揀吓。』我有提佢小心啲，揀個錫你多啲嘅男友，因為係初戀，會記成世。」她又踢爆女兒堅拒富二代︰「佢唔鍾意認叻嗰啲人，尤其係富二代。好多有錢人喺外國讀書，佢好驚，可能見過現實中嘅富二代係點。」

重返幕前憶往事

全因女兒的一句話，珍妹才毅然決定相隔13年後再拍劇︰「之前接咗曾志偉嘅劇本，都有諗吓，睇吓做唔做到。咁啱囡囡嗰段時間就快去外國讀書，我問佢意見，佢話：『你拍啦，我去咗讀書你會悶。』我就決定試吓。」也許是太長時間未有拍劇，珍妹初時認為要重拾演戲節奏相當困難，但短短三個多月的拍攝時間，已令她再次愛上拍劇︰「以前可能拍得太多，覺得重複又重複，想快啲收工咪再煩，依家反而珍惜每日開工嘅機會。開頭有啲唔慣，但唔習慣唔得，其實都開心，每日都好似賺咗咁，拍一日開心一日，拍多次就開心多次，可能咁耐冇拍嘢，想拍啲好嘢畀觀眾睇！」

「拜金女」情路坎坷

提到與李若彤、陳慧珊、張慧儀、袁潔瑩及葉蘊儀等多位久休復出的藝人合作，珍妹感到相當開心，因可趁機增進姊妹情。她於劇中異性緣特別強勁，先後與吳啟華、鄭敬基及單立文有多場對手戲，問到在劇中演繹恨入豪門的拜金女，惟感情路欠暢順，可有勾起往事？她笑說︰「反而勾起細個學校啲嘢，以前班中學同學感情單純，會鬧吓交，真係好懷念，諗番回憶好好。」

合久必婚？「諗吓先」

曾經歷婚姻失敗，多年來尋尋覓覓，珍妹近年似乎已找到所愛，與填詞人潘源良感情穩定，早前更傳兩人有結婚計劃。雖然男友早已搬進家中，但珍妹未想改變現時的生活模式，更斬釘截鐵否認婚訊︰「吓？年年都咁講，都唔係，真係冇Plan ！返去諗吓先，咁多年慣咗咁上下。」問到男友可有行動？她笑說︰「哈哈，唔多覺！其實佢都忙，要做幾樣嘢，仲忙過我，等得閒先啦！」珍妹呻「女大女世界」，指女兒赴加拿大讀中學後便無人相伴，記者提議與男友生番個，她笑說︰「我都鍾意小朋友，以前想生冇空檔，依家冇諗。我諗唔會生喇，太辛苦，有機會不如開託兒所照顧小朋友啦！」

女神變師奶

李麗珍回歸拍劇後身形Fit爆，記得當初淡出幕前時多次被拍得身形大走樣，女神形象幻滅，她笑說︰「唔會唔開心， 因為嗰時冇化妝，加上角度問題， 所以唔會靚。我哋話晒都係師奶，點會成日化到咁行出街？買餸都唔會化妝啦！」一代女神竟自嘲師奶， 珍妹似乎很享受這種生活，有女萬事足！