娛樂專題：少女版李麗珍入屋　王敏奕紐約進補

2004年鄭中基主演的電影《我要做Model》恍如預言一樣， 帶出近年一堆肯露肯搏、發明星夢的模，但新人王敏奕（Venus）卻心口掛個勇字，相比做Model，夢想行頭的她只想講句：「我要做演員！」

影壇新人王敏奕於中學時期成為模特兒，2006年初嘗拍攝滋味，演出電台劇集《過渡青春》，並於2008年首次拍攝電影《烈日當空》，其後拍攝不少廣告及MV，早前更被睇中在無綫劇《女人俱樂部》飾演李麗珍的少女版，演員之路穩步向前。

2012年，Venus暫停學業，隻身前往紐約修讀電影及戲劇課程，上第一堂已令她畢生難忘：「第一堂就要我哋試鏡，做電影《寡佬飛行日記》（Up in the Air）佐治古尼（George Clooney）同Vera Farmiga入面一場調情戲，我做得好差，毫無準備，完全唔知自己講緊乜！」而最後一堂再做一次試鏡，並要在全班同學及一眾當地導演、電影工作者面前表演，認真程度令Venus大開眼界：「一場戲都可以研究咁耐，我明白到演員唔係一份簡單嘅職業，有啲同學本身已經係演員都嚟進修，佢哋好尊重自己嘅職業！」她形容這一個月的旅程獲益良多，不論心態還是演技都有很大的轉變：「細個玩玩吓，咩都想試，依家真係知道演員唔係咁易做，演繹一個同自己完全唔同嘅人、唔同嘅人生，係好特別嘅事！」

「專業性感」有得傾

時下不少年輕女星都不介意露肉行性感，作為專業演員的Venus亦不介意為劇情而作性感演出：「《澳門街》有場戲我着住婚紗喺條街走嚟走去，都性感嘅，但拍拍吓導演覺得唔合理，冇人會着到咁喺條街度，所以就着番件外套，性感冇問題，但要同導演傾，要睇劇情需要同合唔合理。」

一夜收服二千Fans

無綫劇《女人俱樂部》自播出後大獲好評，帶挈演少女版李麗珍的Venus人氣急升，除在街上被途人認出外，其Instagram 更每晚狂升二千Followers，可見Venus 的入屋程度爆晒燈！ Venus亦為此大感興奮：「多咗好多人留意我，收到好多正面同支持嘅留言，好多人都讚好睇，同讚我演得好，係作為演員最開心嘅讚賞，覺得好感恩！」

Profile

姓　　名：王敏奕 （Venus）

生　　日：1992年1月1日

身　　高：1米64

星　　座：山羊座

興　　趣：烹飪、做運動

演出作品：《烈日當空》、《DIVA 華麗之後》及《超級經理人》等