朱千雪馬國明拍劇成日見：攰會各自返去訓覺

藝人朱千雪（Tracy)及張秀文（Sammi)以世界盃大使身份出席無綫世界盃活動，二人獲球星教路踢波，可惜都係雞手鴨腳，場面搞笑！問二人球技如何？Tracy自嘲落場陪跑：「次次都冇人交波畀我，落場齋跑。」而Sammi則自覺有進步，因為成功「掂波邊」。

張秀文搵高鈞賢做私人保鏢

談及即將前往巴西為世界盃拍攝特輯，Sammi表示若遇到熱情球迷會搵高鈞賢保護：「我周三會飛去巴西，（遇熱情球迷？）如果有人攬同咀我，我會叫高鈞賢咀咗佢先！」

談到有報道指趕拍新劇《流氓皇帝》的Tracy避見「荀盤」馬國明，她解釋二人開戲時日日見面：「冇避開，每次開工拍外景同廠景都見到佢，（表現避忌？）冇！就算有時被影到都係工作上接觸，（收工一齊食飯？）一班人食飯，（兩人撐枱腳？）佢化老妝後通常拍足成日，收工好夜，太攰會各自返去訓覺。」