黃浩然世界盃捧阿根廷巴西

藝人黃浩然到跑馬地出席一間資產管理公司主辦的少年足球比賽記者會，並擔任活動大使。席上球員盧均宜雙手將足球交給浩然示意要他露兩腳，但浩然就即時婉拒。事後問浩然為何不展示腳法，他就笑說：「梗係唔好獻醜啦，呢啲咁嘅環境。因為我記得踢得密嘅時候係中學嗰時，我讀香港鄧鏡波，個場好細，傳波要踢落塊牆度嗰啲嚟。」又感慨長大後難約人踢波，但都有約人睇波。

浩然又透露仔仔學踢波半年令他感受深刻：「除咗團隊精神之外，就係佢見識到個世界。我依家都畀仔仔接觸唔同嘢，因為自己踢得唔叻，就睇吓佢鍾唔鍾意先。」又表示自己就算工作幾忙，都會抽時間陪仔仔踢波。至於日後會否送仔仔出國踢？他笑說：「呢個後話啦！」但他都喜歡看到仔仔因足球漸懂紀律和合群。

問到世界盃捧邊隊，浩然就指捧阿根廷和巴西，又笑稱自己未做好功課：「自己由細到大都習慣咗會到世界盃前兩三個禮拜惡補哂之前嘅球賽，同約一大班人去睇波。仲有牙骹戰賭餐飯。」又表示會錄影世界盃賽事，第日同仔仔一齊睇，認真係廿四孝老竇。