娛樂專題：蔡思貝陳凱琳打開天窗見真情

20140602
  • 東網電視
    更多新聞短片
    蔡思貝與陳凱琳於選美時，已不斷被傳媒拿作比較。
    應屆香港小姐冠軍陳凱琳與亞軍蔡思貝競選港姐時被傳媒喻為宿敵作比較，由競爭對手成為交心好友為對方有喊有笑， 全因一次面對面「講數」打開心窗，誤會從此而解。而陳凱琳談到感動一刻是見到蔡思貝為她奪得華姐感動流淚，覺得她是真正朋友！
    選港姐未混熟
    陳：陳凱琳 蔡：蔡思貝
    陳：參選港姐嗰陣因為有二十個女仔所以同你唔係好熟，最深印象係面試，嗰陣個個都着靚女裙，但你着住件透視裝黑色Top，當時覺得呢個女仔幾特別喎，好有外國女仔味道。
    蔡：第一次見你覺得你好多嘢講、好嘈，你帶起大家玩遊戲，覺得呢個女仔好有領導才能，又帶起啲話題令氣氛好開心，覺得你好有味道、好Charm。入選後一齊訓練，仲諗住主動約埋去跑步，到依家都仲未成事。
    少見珍惜相處
    陳：參選嗰陣都會同前後冧巴嘅女仔熟啲，到我哋好熟落真係要去到攞獎之後就日見夜見，但係呢排各有各忙少咗見面反而更珍惜見面機會，傾吓呢排做緊咩、互相關心。一齊上訓練班會趁午飯坐埋傾偈，大家會因對方有唔同工作而開心，又互相畀吓意見。
    蔡：我係好易鑽牛角尖嘅人，畀壓力自己，鍾意收收埋埋唔同人講。
    陳：遇到問題我會搵朋友、屋企人傾，驚愈收愈埋有一日會爆發。
    蔡：可能我慣咗自己喺外國讀書，唔能夠無時無刻都打畀父母，有問題都自己解決。
    講數盡訴心聲
    陳：我覺得同你最大改變係選華姐嗰陣，見到你嘅情感出晒嚟，你份人係好爽，好少會見到你喊，仲要係為咗我而喊。
    蔡：當時係好戥你感動，好似睇住個女出嫁咁，大家參選一齊經歷咗好多，呢個獎對你好重要，可以話係你嘅人生第二頁，所以當然見你攞咗冠軍真係好戥你開心。
    陳：嗰晚現場見到你眼濕濕，嚟化妝間搵我送咗隻貼滿晒我哋啲相嘅杯叫我加油， 同我講飲完熱飲上台會冇咁凍，我覺得好Warm，喺台上見到你睇得好肉緊，就知道呢個朋友好支持我。
    拎亞軍好開心
    蔡：選美嗰陣傳媒會將我哋比較，好多人問我攞唔到冠軍會唔會唔開心，其實我幾鍾意亞軍，人比人比死人，冠軍、亞軍只係一個Title，攞完獎大家都有唔同嘅路要行。
    陳：你記唔記得有次同你傾偈，講到有時你可能會覺得我說話針對你，點解會有咁嘅誤會呢﹖可能大家都有啲敏感，攞咗出嚟傾之後大家就冇咗個誤會。
    蔡：當時我反感係點解你要咁講呢，但原來你唔係咁嘅意思，係我敏感咗，傾完之後感情係愈嚟愈好。
    陳：有時遇到問題唔可以嘻嘻哈哈去講就算，如果有心交朋友，真係要坐低慢慢去傾，唔想因為呢啲誤會影響咗大家關係。
    愛做戲演下去
    蔡：我份人一向好直，喺你身上學到做事圓滑啲，好似以前見到人着件褸唔靚會直接同佢講件褸好核突，依家會用婉轉啲嘅方法去講，會諗人哋感受，有時太直率唔係好事。
    陳：你諗嘢其實好周到，做完一樣嘢會反覆咁諗，好似第一次拍劇，唔係話拍完就算，反覆諗吓有咩做得好同唔好，咁先會有進步。
    願花十年時間
    蔡：其實我冇諗過自己會咁鍾意做戲，可能合作同事都好好人， 好似鄭俊弘、梁烈唯、朱晨麗個個都好好，開工好開心。
    陳：我做過主持、司儀之後都好鍾意，希望放十年八年時間落去，你睇田蕊妮、鍾嘉欣都放咗好多時間先有咁嘅成績，拍第一套劇《商戰》啲朋友話好想睇，搞到我好緊張，驚令人失望。