單挑三屆視帝祥仔　影帝秋生貼錢爭視帝

影帝黃秋生相隔20年回歸香港電視圈，「出山」接拍好友王心慰監製的無綫新劇《梟雄》。為襯得起這位影帝，新劇排出強勁陣容，出動視帝黎耀祥、視后胡杏兒及劇后蘇玉華陪襯秋生，而久未拍港劇的湯鎮業及男神馬國明、吳卓羲與唐詩詠等亦有份演出，齊齊做場好戲！

斥巨資上海搭景

《梟》劇為今年重頭劇，監製王心慰昨日於電話中坦言該劇是她於無綫投放最多資金的電視劇︰「係天文數字！好似喺上海影城搭景，衫同車都用好多錢，而且一場普通街景，臨時演員都會有200至300人。」她還透露《梟》劇以20至50年代為主題，將於下月開鏡，預計拍攝近半年，並於上海取景。如此大製作及華麗卡士，據知無綫想為影圈獲獎無數的秋生能夠一嘗奪視帝滋味而鋪路，問到是否想秋生憑此劇奪視帝，王心慰說︰「總之拍我劇嘅人，我都想佢拎。」

昨日秋生、祥仔、湯鎮業、吳卓羲與唐詩詠等出席《梟》劇記者會，女主角胡杏兒、蘇玉華與馬國明因工作缺席。秋生坦言今次「出山」拍劇是答謝王心慰當年提攜之恩︰「唔係還人情，係一個心願想再拍Amy（王心慰）嘅戲。當年仲喺亞視，多謝佢搵我拍《王昭君》。」他笑言拍劇酬勞少︰「返嚟嗰份入油都唔夠啦！要倒貼咁滯。」

事後，秋生於電話訪問中對於拍攝歷時半年要推掉不少工作，問到損失多少？他說︰「唔計啦！做咩要令自己唔開心。」提到有指無綫鋪路贏視帝，秋生笑言冇意義：「有就多謝，冇都冇所謂！金像獎我唔恨拎，除非係奧斯卡。」