陳豪期待帶囝囝游水：太細體溫好難Hold

藝人陳豪在長沙灣出席無綫劇集《陪著你走》收工飯。他表示月尾就會開新劇：「暫時個名叫《水髮胭脂》。（蓋鳴暉嗰套？）係呀，我做室內設計師。」將近父親節問他會怎樣慶祝？陳豪就指囝囝得六個月大：「依家先識坐。（識叫爸爸？）未呀，識坐已經好開心。父親節嗰日就一家大細出去食吓飯、行吓街都好開心。」問老婆陳茵媺會否代囝囝送禮？他就笑說老婆好忙：「淨係湊BB都用哂佢所有時間，其實禮物唔緊要，可以大家一齊已經好開心，我好易開心架。」其後，記者就笑他母親節沒送禮物，陳豪就死撐話自己有慶祝：「有送花，基本嘢我有做。」

至於拍攝完《陪著你走》的心情，陳豪就指自己沒有特別感覺。問會否趁有時間出埠嘆一下？陳豪就坦言暫未有計畫：「睇吓時間囉，如果有時間我諗會出去行吓，我都想嘅。」不過他又表示上次帶囝囝去泰國玩，最辛苦是自己：「全部嘢都係我孭！」而囝囝坐飛機都好乖，沒有特別扭計：「期待住帶佢游水。（香港游都得？）未呀，醫生建議最好六個月之後，因為太細嘅BB體溫hold得唔係咁好，好快就會冇哂體溫。」又指囝囝鍾意水，會特意調教合適水溫讓他在浴缸玩兼沖涼。