胡杏兒用演技感動秋生

藝人胡杏兒在長沙灣出席無綫劇集《陪著你走》收工飯。她表示這套劇很快就拍完：「啲狗狗又乖、啲人又乖，所以我都覺得拍得好快。係阿Mo（陳豪）辛苦啲囉，佢戲份最多，條條線都關佢事，佢又要湊仔，依家應該可以多番啲時間。」

拍完此劇後，杏兒很快就會和黃秋生合作拍《梟雄》（暫名）：「我應該係七月開工，所以有得抖下。（搵錢？）做吓活動囉，跟住返內地又有啲活動咁。（順手搵男友？）難啲，搵錢易過搵男朋友，真係。冇所謂啦！隨緣啦！（養狗陪你？）我有八隻貓，可以當住先嘅。」她最不捨得同劇的導盲犬。

讚張敬軒演技超班

兒坦言十分期待和秋生拍劇：「係一個虛心學習嘅好機會，咁多好戲之人。」有報道指秋生稱拍劇要倒貼，杏兒笑說：「佢拍開幾百萬，又點同呢！不過相信佢都唔係向錢看，返嚟都係為興趣。之前我有睇佢舞台劇，覺得超勁，秋生哥勁就緊係啦！我覺得軒仔（張敬軒）都超晒班！因為嗰套戲真係好難演。」

問是否恨做舞台劇？她說：「因為舞台劇又係另一樣嘢，我之前都做過，差唔多十年前，睇吓有冇機會。」她希望用演技感動秋生，令他邀請演舞台劇。問與秋生合作可有壓力？杏兒認為壓力等於動力：「都好開心自己有機會參與。（攞獎劇？）唔諗呢啲，咁多好戲之人，總之令到秋生哥覺得我好已經勁過攞獎。」