張慧儀戲癮到　望飾演單親媽媽

10年後復出拍無綫劇《女人俱樂部》的張慧儀，狀態回勇，更被撻著一股戲癮，她坦言希望重返電視圈再創新一頁，講到明有戲癮，當然對角色有要求，相信是現實生活及受養子Hanson的影響，慧儀稱再拍劇的話很想演單親媽媽角色，將最真實的個人感受呈現觀眾眼前。

40年華的慧儀，外表保養得宜，屬時下「美魔女」一族，難得願意放下靚樣飾演樸實的母親，她笑說：「我喺《女》劇刻意唔打扮都可以啦，演戲我唔介意，因為係一個角色，只要平日出嚟大家見到我仍然係靚嘅咪得囉！（怪唔得吸引到最近盛傳嘅富商追求？）只係朋友，唔係過電嗰隻，不過我唔係變態嘅，有啱我一定會大膽去試，只係未遇到，（條件高？）對我好又要對我囝囝好，仲要大家思想一致，識得欣賞我......的確唔係容易搵，我呢十年都未遇過！」

愛情有點Dry的慧儀，拍拖雖未有着落，但其心靈並不空虛，因為養子Hanson給予最大的慰藉，慧儀坦言Hanson是她全部，為了養子有更適合的教育，她不惜放棄內地生意基地，轉戰香港開小型超級巿場，目的可留港方便Hanson入讀本地國際學校，加上Hanson患有先天性心臟病需長期接受治療，醫藥費對慧儀而言是個龐大支出，愛子心切的她希望借《女》所帶來的知名度，重返電視圈，留港打拼，藉以賺取更豐厚的收入來應付養子每年近200萬學費及六位數字醫藥費，可謂廿四孝母親。