彭順機艙專訪：未氹掂心潔　與Liddy失聯絡

20140609
  • 東網電視
    更多新聞短片
    彭順現身香港機場接受訪問，從身邊朋友口中得悉，他未氹掂老婆李心潔，與Liddy已失去聯絡。
    彭順早前被拍得搭上o靚模李悅彤（Liddy），之後他即飛返馬來西亞向太太李心潔箍煲，同時，Liddy屋企遭逢巨變，其父李德仁早前疑在九龍灣啟晴邨殺人後吞槍自殺，事件極惹人關注。
    在馬來西亞閉關多時的彭順終於現身，清減了不少的他從馬來西亞返港，再轉機到北京傾工作，彭順曾在香港機場禁區的快餐店醫肚，見他胃口普通，當他邊上機邊接受傳媒訪問時，樣子亦帶點憔悴，語帶無奈。
    彭：彭順　記：記者
    記：係咪畀咗筆錢安頓Liddy？
    彭：全部編出嚟，我編都無佢哋咁精彩！
    記：你係咪同Liddy承諾過，會同李心潔離婚再同佢結婚？
    彭：冇，全部都係捏造出嚟，無咁嘅事。
    記：知唔知Liddy父親啲事？
    彭：知道。
    記：警方有無聯絡你？
    彭：冇，但我都想知道情況，了解多咗，睇咗發生乜事。
    記：會唔會係因為你哋嘅問題刺激到Liddy爸爸？
    彭：唔答。
    記：你有冇同你個女傾過件事（指Liddy偷食事件）？
    彭：同個女都有傾過。
    記：個女有冇乜嘢表態？
    彭：唔答。
    記：同李心潔關係點？
    彭：OK啦！家事唔答，想Cool Down、安頓自己。
    記：安頓咗屋企人未？
    彭：要先安頓咗自己。
    據彭順身邊好友透露，彭順仍未冧掂李心潔，所以彭順心情仍愁爆，亦明白自己今次鑄成大錯，必須承擔責任，要做很多事才能再獲李心潔信任及原諒，彭順好友說：「發生咁大件事，唔係一朝一夕可以解決，佢（指彭順）要花好多心機再獲老婆信任。（之前李心潔喺馬來西亞殘爆睇醫生？）咁啱胃痛，件事未至於要去睇醫生。」好友還指彭順今次返大陸工作後，亦會極速返馬來西亞陪老婆，希望獲原諒。
    至於Liddy，彭順好友指他站在朋友立場，仍關心Liddy：「拖手照曝光之後，彭順都搵唔到Liddy，加上槍擊事件後，佢更加搵唔到佢，彭順好擔心Liddy，畢竟佢覺得Liddy廿幾歲就要面對咁多大打擊，身為朋友，心情都好沉重。」
    寰宇高層力撐開戲
    而彭順今次返大陸傾談工作後，會繼續籌備八月在台灣開拍寰宇有份投資的新戲，但因最近實在發生太多事，好友指彭順都擔心未能如期開拍電影。
    寰宇高層兼彭順好友林小強，對於電影有機會要延期則說：「最緊要套戲好，籌備充足，劇本、卡士都搞掂晒，遲啲開唔係一個問題，但依家暫時都未有咁打算。」