林峯床上Chok親腰？吳千語：佢係運動加舊患

林峯女友吳千語戴上價值過千萬的鑽飾出席活動時，表示頸上所戴的鑽石為16卡，是她戴過最大的鑽石。問到她收過林峯最大的鑽石是多大？她說：「呢啲係心意唔係卡數，都未送過戒指，戒指喺重要嘅時候送。（係咪等緊收？）可以自己買嘅，結婚戒指就唔急嘅。」

而提到林峯chok因傷腰而缺席上海電視節，她坦言知道對方受傷，續說：「都幾嚴重，佢要照磁力共振，等緊報告。我有同佢睇醫生。（佢喺床上chok親，係咪你間接造成？）唔係，佢係做運動造成㗎，佢最近好努力做Gym。可能做得太密同姿勢唔啱。（據知係喺床上chok親喎。）佢係做運動閃親，係舊患加新傷。（幾時康復？）唔知幾耐，聽講佢幾嚴重，依家唔係好行到。佢拍戲多舊患，之前傷過，加上做運動，所以變到咁嚴重。（會唔會影響到生育能力？）醫生叫佢休息，唔可以做運動同郁動太多，好似話傷組織，我都唔太清楚。（督促佢休息？）佢都行唔到，要時間休息。（請假陪佢？）最多陪佢睇醫生，之後我要做嘢。佢都係要多休息、食藥、瞓覺。（心痛？）我有叮囑佢多休息，佢之後好似要做物理治療。（幫佢按摩？）唔可以亂掂，醫生叫佢唔好出去按摩。」