謝安琪送香水給父親　做榜樣教兒子孝順

歌手謝安琪今日到無綫電視城出席《2014勁歌金曲優秀選第一回》直播。她表示雖然今日沒有候選歌，但做了一陣司儀：「好開心，第一次做《勁歌》嘅司儀。同埋今日咁啱獲獎嘅歌手都係我好好嘅朋友，鏗鏗（許廷鏗）呀、欣宜呀、木偶哥（林師傑）呀。木偶哥第一次攞獎，我見佢頭先喊我都好感動。」

問父親節怎樣慶祝？謝安琪就指自己會和爸爸慶祝：「佢（張繼聰）嗰part交畀佢個仔！」不過其實都會一家人集體慶祝。問仔仔會怎樣為老公慶祝？她就笑說仔仔會將朋友送的禮物轉贈給老公：「因為佢生日，近排就收到好多禮物，佢將啲唔係咁啱心水嘅儲起咗，譬如女仔玩嘅煮飯仔就分類擺埋一邊，我諗佢就會係呢啲場合拎出嚟送。（送邊份畀老豆？）佢冇講，但佢有日拎朵用再造物料整嘅手造花送畀爸爸，話好靚，相信都係呢啲計仔。」

問謝安琪會送什麼給自己爸爸？她就指會送香水：「我好鍾意佢有一個好男人味嘅形象。」至於會否送給老公？她就笑說：「佢又唔係我爸爸！我分得好清楚，我自己孝順我自己爸爸媽媽，做個好榜樣畀瞻瞻。」而母親節時仔仔就送了卡和橡筋手繩給她：「我有戴過出show架，我尊重佢架！」