李麗珍做生意唔識用電腦：要搵朋友幫手

李麗珍（珍妹）和葉蘊儀齊齊出席時裝騷撐好友場，現場還有一班小朋友行騷，問到為何不帶自己的小朋友來看，葉蘊儀說：「我嗰啲唔係小朋友，唔啱睇。」問到兩人可會想再生個，她們即表示趕不及生了。

提到珍妹的自家飾物品牌生意，她說：「諗緊個名，可能會用個M字，M字啱我哋，我想用Memories，代表回憶。我嗰啲係Colour Stone，鑽石好貴。網上嘅嘢我唔識，電腦嘢完全唔識，要搵朋友幫手，試過有次用唔到電腦，原來未開制。產品方面就會搵肥菜（葉蘊儀）幫手，佢依家有自己嘅舖，整得好靚，遲啲我嘅產品會擺喺佢度試吓賣先。」

珍妹的品牌應會於下月Launch，她說：「我好慢熱，係肥菜成日催我快啲。」兩人又透露父親節會與爸爸及家人一起吃飯慶祝，並會封利是給爸爸作禮物。