陳百祥力撐無綫：畀少少錢都合理

藝人陳百祥（阿叻）喺長沙灣出席明星足球隊有份投資嘅火鍋店開幕，佢話幾日後會跟無綫大隊去巴西，為四強講波，提到老友李克勤嘅愛隊英格蘭出局，阿叻就一輪嘴咁話：「係人都知英格蘭唔夠踢喇，總係有人含淚捧英格蘭，好似我含淚捧黃杏秀咁，邊個都有心頭好，輸咗咪入房喊囉！荷蘭幾十年都做二奶，今次有機會改寫歷史！」

之前蔡卓妍喺微博訴冇得睇世界盃，阿叻就話：「佢仲係細路女，唔知足球咁貴，要四億幾，唔係個個識睇波，識睇嘅畀少少錢都合理。」之後阿叻仲好似無綫代言人上身咁，話冇可能免費播晒64場波，仲話如果有線或者NowTV播，可能會逐場計錢o添，佢又話：「唔明點解要complain，唔覺得TVB刻薄！」