徐子珊生日一朵花都冇：真係要檢討下

無綫花旦徐子珊以低胸裝出席劇集《點金勝手》宣傳，提到本月19日生辰與一班好友在土耳其度過，她指今趟純粹行吓唞吓，問到有否艷遇？她說：「試過一個人去旅行都遇唔到，好難㗎，我唔可以異地戀，我要成日黐住對方，我係好黐身嗰啲，以前試過識到，但未了解都走咗啦。（朋友中有追求者？）朋友啫。」

問到有否收到神秘禮物？子珊笑謂：「一朵花都冇收到，我真係要檢討自己，最開心係收到兩個姨甥女唱生日歌，仲Send Video嚟畀我，好Sweet好得意。（想生返個？）盡快啦，真係好Cute，好鍾意小朋友。」

子珊又表示最近間中也會睇世界盃，並笑稱：「今年全部爆冷嘅，好彩我買唔賭搏冇買波，唔係就慘喇，真係估佢唔到，（支持邊隊？）我捧德國，仲有少少機會嘅，我覺得德國有機，不過唔好信我，我唔係專業意見。」今晨荷蘭2:0贏智利，問是否荷蘭擁躉？她卻回應：「荷蘭都好，但今年渣渣哋，（贏咗智利喎！）噚晚我冇睇。」