巴西狂迷施襲　苟芸慧遭非禮喪喊

現正身處巴西採訪世界盃的苟芸慧，早前於做訪問期間，遭一名智利的瘋狂球迷突然衝上前「咀嘴」，嚇至發呆的苟姑娘，當時完全不懂得做反應，而遠距離拍攝中的工作人員，亦全部呆立當場。該名「索吻」球迷得逞後，即玩快閃，之後巴西導遊曾問苟姑娘是否需要報警，不過苟姑娘因不想搞大事件及阻礙拍攝進度，故未有即時報案。

苟姑娘事後接受訪問時，明顯猶有餘悸：「其實時不時都畀啲球迷抱起、攬住、錫都好正常，但突然之間咀嘴，自己真係接受唔到，一片空白，嗰陣個個都呆晒，大家都唔知做得乜，自己Frozen（凍結）咗咁，之後我自己行開，Cool Down一下，直至個女導遊安慰我，叫我一定要發洩出嚟，我嗰刻真係忍唔住，喊完真係舒服好多，始終係幾侵犯性，呢件事對我打擊幾大。」

問會否有陰影？她坦言自事件發生後，連續兩日拍攝時都會不其然回想起當時遭「突襲」的情況：「我同自己講，唔好再諗，只係想繼續做好節目，唔想畀呢啲嘢影響工作，唔想將件事放大，心理上自己舒服咗。」未知是否因事件影響，苟芸慧最終捱病，難得她還風趣的在微博上載病容照，並留言：「病了，給自己一個紅牌...明天繼續努力。」