唔同老公慶生日　劉嘉玲忙爆：佢唔會寂寞

劉嘉玲出席腕錶品牌活動，她甫抵步不久即表示趕着離開，被問是否趕去為今生日的老公梁朝偉慶祝？嘉玲說：「唔係，我要趕去綵排舞台劇《杜老誌》，每日都要綵排八個鐘，所以要借你哋喺度同偉仔講生日快樂。（有冇預早慶祝咗？）冇。（畀surprise佢？）Surprise就係無得同佢食飯。（佢啲fans日前同佢慶祝咗？）係，啲fans每年都會同佢慶祝，來自世界各地，所以佢唔會寂寞。（偉仔今晚點慶祝？）應該同朋友慶祝生日。（會唔會送禮物畀佢？）準備咗，佢都會送禮物畀我。唔知佢鍾唔鍾意我份禮物，係一份心意。」

壓力大到嘔

此外，嘉玲透露還要排練多兩個多星期，是此演出很大壓力，因覺得舞台劇跟她很陌生和有距離，還因此失眠，但則表示沒有吃安眠藥，自己不會依靠藥物。她說：「嗰日做咗個測試，知道自己壓力爆煲，耐唔耐就發忟憎、嘔、周身唔聚財，呢啲反應平時冇嘅，依家我瞓覺、行路同做運動都滿腦子對白。（偉仔咪要忍下？）係㗎。（佢忍到？）佢咪唔出聲囉。佢都準備緊，操緊，九月要開新戲，咩戲等佢自己公布，係喜劇嚟。佢操緊體能，操fit啲，我都要鍛煉好身體，演廿六場無替身，要好大體力，演一場都虛脫。暫時都戒咗酒，等自己醒啲。覺得最難係台詞，同電影唔同，舞台劇每一秒都要Stand by，要進入個角色，好佩服謝君豪，佢一上台就好似角色人物上咗身咁。我同梁家輝就比較吃力。」