黃秋生首日開劇　馬國明入廠學嘢

黃秋生首日現身無拍攝劇集《梟雄》，即引來不少藝人前來偷師，但經驗豐富的他竟然自稱緊張兼怕怕！秋生又笑言角色要有四個老婆先夠，認真大貪！而飾演秋生年輕版的馬國明更特意回來睇秋生做戲，坦言要學對方神髓！

影帝黃秋生昨晚首日現身電視廣播城為監製王心慰的新劇《梟雄》開工，身穿灰色民初長衫戲服的他自言好緊張：「唔知點做，唔識做。（唔識？）好出奇？幾跑得嘅人偶然都會仆低。」他又表示角色未算複雜，但仍未能揣摩到角色。談到飾演其年輕版的馬國明將會跟他研究角色，秋生說：「真係唔識講。」

讚大婆二奶又索又靚

劇中，秋生將與胡杏兒有不少對手戲，對於杏兒，秋生大讚：「幾靚女、幾正，睇過佢以前嘅戲都幾好，如果對住啲唔靚嘅，就做唔到戲，冇交流，最緊要個樣唔好討厭，蘇玉華就有大婆相，我個角色應該要有四個老婆，兩個太少！」

不少藝人和工作人員坦言想觀摩秋生演技，他反指好驚，更打趣說：「我返嚟都係想嘻嘻哈哈過日辰，睇吓靚女走嚟走去。」認真風趣！

飾演秋生年輕版的馬國明坦言特意回來看秋生拍戲，馬國明說：「我都係第一次做年輕版角色，所以要睇吓秋生哥有乜嘢設計落個角色度。（一齊研究？）唔會啦！我都係聽咋。」問和秋生沒有對手戲會否可惜？他指做年輕版緊要過做對手戲：「難得可以窺探影帝點設計角色，一定學到好多嘢！」而正在拍攝《天眼》的洪永城表示有時間都會「過廠」觀摩一下秋生做戲。