沈震軒傷住開工唔敢休息

無綫藝員沈震軒（Sammy）月前因拍劇集《使徒行者》整斷手，但他仍堅持繼續開工，完成劇集後又為新歌《親愛的》練舞及拍MV，認真拚搏！他直言現時右手尚未十成康復，生活細節仍受影響：「整親手對生活有好大影響，之前最嚴重係着衫都着唔到，要屋企人幫手，做好小事都要搞成個鐘！到最近好番大半，舉重嘢都仲要好小心，以前慣咗用手碗力撐自己起身，依家要就住，其實醫生建議我抖，但我唔想放棄任何機會，所以都冇停過工作。」