陳嘉寶爆有人出價50萬包「旅行」：好侮辱

藝人陳嘉寶（Anjaylia）與王敏奕（Venus）一同出席活動，現場見到Anjay所穿的白色貼身裙透出內褲，活動完結後助手即為她披上圍巾，Anjay表示：「其實裏面（內褲）我已經特登去買，sales姐姐話唔會現痕。（退錢？）睇嚟要喇，哈哈！（有冇試過走光？）冇，我出名係打底王。」

Anjay透露近日收到不少自稱內地企業公司，高價邀請她去「旅行」，她說：「對方話每個月會出好多錢，叫我去旅行，微博、wechat都有。（幾多錢？）一個月50萬，話會有車有樓。唔使再send畀我，一日收幾次，我覺得好煩同好侮辱。」Venus就表示無收過此類信息，不過就有透過微博收過電影試鏡的邀請：「我click入去個profile睇，全部都係好性感嘅相，有制服誘惑，我唔得。」