時裝路唔怕遲　Yumiko老公點醒尋幸福

幸福不會遺漏任何人，總有一天它會找到你。鄭希怡遇上丈夫梁學儲飽嘗甜蜜幸福滋味，但她認為真正的幸福是一種人生態度， 是心中的一種滿足感，她為實現理想而踏上「時裝路」開拓人生新一章，從中得到的滿足感就是幸福。幸福與否，自己絕對有話事權！

2012 年，鄭希怡（Yumiko）在泰國墮坡以致頸椎移位，曾昏迷兩天的她在受傷期間得到當時仍是男友的梁學儲（Andy）貼心照顧，更獲承諾一生一世情不變，Yumiko 被深情打動， 二人結束八年愛情長跑，翌年在泰國披上嫁衣，Yumiko 說： 「患難見真情難能可貴，這段期間他對我不離不棄，真係好感動， 經歷令我成長，也令我感受到幸福滿溢。」婚後的她沒有放棄演藝事業，反之北上發展賺人仔，雖然與Andy 經常分隔兩地，卻能保存那份新鮮感，她笑說：「小別勝新婚嘛！何況我唔使開工就會趕返香港，而佢有時間都會嚟探班。」每當說到丈夫Andy，她即面露甜蜜笑容，看着她一雙笑瞇瞇的眼睛，完全感受到她已被幸福擁抱着！

獲老公支持

沒有Andy，就沒有今天站在時裝路上的Yumiko。雖然她早已洞悉網購市場前景廣闊，卻遲遲未把握機會去實踐時裝夢，直至Andy 的一番話，令她如夢初醒，反問自己還在等甚麼：「佢問我仲要諗幾耐？既然想做就去做。我確實諗咗幾年，之前拍戲， 一直冇時間籌備，我唔可以再畀藉口自己，自己唔行出第一步，問題點解決，老公有畀意見我，佢好支持我，仲係我嘅原動力。」隨即與友人合資七位數字，開設時裝網店Whysocool。

屋企變貨倉

問到是否向時裝界進發？她笑說：「雖然起步遲咗，但唔緊要，有做好過冇做嘛！」如今網購平台競爭激烈，Yumiko 卻冇有怕，對前景充滿信心，難道她有獨門必殺技面對種種挑戰？她笑了笑說：「自己會親身上陣， 以模特兒同造型師身份，教大家mix & match，同一條牛仔褲都可以着出七款造型，就算唔買，淨睇我哋網站都會有得着。」她又笑言現在把家裏變成貨倉，儲有數百件服飾， 為理想犧牲私人空間都值得。

徐濠縈啟蒙

Yumiko 由昔日的購物狂演變成今日的時裝精，將這個購物樂趣轉化為生意，或多或少深受身邊好友影響，而徐濠縈更是她的啟蒙者：「我覺得佢好叻，從零開始，佢唔單止有時尚觸覺，仲好勤力，係佢啟發我做呢門生意，佢好有自己style，我好欣賞佢！」人生另一種幸福快樂莫過於相約三五知己把酒談心，而Yumiko 很珍惜友情，認為彼此間真摯友情是「緣」來不易： 「我哋一班好姊妹定期有約，圍埋一齊都離唔開時裝經，大家都咁貪靚，而Helen（杜如風）仲講唔停添！」及後更大爆老公也是貪靚之人，與她趣味相投，說時面上再次展露幸福笑容。

Yumiko 在訪問期間面上總帶着稚氣的笑容，她從過去的種種經歷中學會放下、接受與珍惜， 令她活得開心自在。從對話中也感受到她很重情，很感謝那些每次陪在她身邊的人，現在還有他——Andy 。所謂「知足常樂」，成為梁太對她來說亦是幸福的一種！

新鮮風格

Yumiko 表示自己不愛隨潮流而行， 沒有特定造型，自己風格就是源自那份新鮮感，她笑着解釋：「我風格一期期， 有時鍾意男性化嘅褲款打扮，今期就鍾意女性化嘅pencil skirt 同魚尾裙造型，我着衫好階段性，哈⋯⋯」女人果然善變！問到會否參與時裝設計工作？她直言有興趣，但排山倒海的工作卻令她分身不暇：「暫時真係冇時間，一步步嚟，設計工作係我下一步計劃之內。」