張達明否認癌病復發：So Far托賴都冇事

抗癌戰士張達明下午出席某講座，與市民分享抗癌經過，他說：「唔好彩除咗鼻咽癌，我都有後遺症，好似手腳麻痹同鼻竇炎，我可以分享好多治療經歷，另外都分享吓深情嘅嘢，鼓勵吓啲病人，因為正能量對病情好緊要。」

問到現時的身體狀況？達明說：「除咗瘦，精神各樣嘢同身體都幾好，但手腳麻痹仲需要時間醫，西醫話冇辦法，要等佢自己好，中醫就話可以針灸，我依家都keep住做物理治療，幫我鬆筋骨，等啲血行得好啲，我覺得麻痹感少啲。」

有傳張達明癌病復發，並暴瘦至110磅，更需以中西療法治療，不過現場所見，達明不僅精神飽滿，受訪時更中氣十足，對此他笑住回應：「佢（傳媒）跟我幾日周圍去，之前我去做排毒嗰日，再跟我去中醫，其實我鼻竇炎鼻塞啫，順便帶我女去，因為佢咳，講到我好似翻發就嚟死咁，咁你見到我唔係，都唔需要再解釋。（有無復發？）So Far托賴都冇事。」

笑言體重唔夠110磅：夏天會瘦啲

問是否瘦到110磅？他笑謂：「有110磅就好喇，我冇嘢呀，以前128磅左右，我瘦咗差唔多廿磅，依家咪100零幾磅囉，夏天熱又會瘦啲，我啲仔女又病又考試，我點會唔瘦呀，仲忙過返工。」他又指鼻竇炎會影響社交和聲線，因此目前正食中西藥調理。