林夏薇請食飯不設上限

藝人林夏薇（薇薇）在上環與一眾無綫劇集《寒山潛龍》的演員食晚飯。她非常感謝請食飯的李詩韻：「今日阿嫂（李詩韻）請食飯，好開心，第一次可以大家一齊食飯、一齊睇《寒山》、一齊笑。我哋諗緊每個禮拜大家輪流一人一次。」薇薇亦知道劇集口碑甚佳：「好多謝大家咁支持呢套劇，我哋自己拍嗰時都好開心，都係咁笑。」又表示當時覺得可能只是自己拍自己笑，但幸好出街後反應都不錯，更透露未來劇情愈來愈精彩。問幾時到薇薇請食飯？她就爽快回答：「我好快！今餐詩韻請，嚟緊應該係馬明（馬國明），跟住就我同（敖）嘉年啦！我哋冇所謂，排名不分先後！（出幾多錢請？）咁就冇諗過，多啲人嚟就多啲人氣，最緊要大家一齊紅紅火火！」