廿四孝媽媽陳茵媺餵食囝囝先試味

陳茵媺（Aimee）出席有關食物健康的活動，她被問及平日會否為兒子陳梓燁（Aiden）小心揀選食物？她說：「係呀，因為始終食落肚，同埋係佢第一次接觸食物，小朋友腸胃又冇大人咁好。其實我自己食嘢都好小心，我媽咪都係，驚食咗會敏感，對身體冇咁好，有毒素會排唔到出嚟，毒素愈積愈多咪會毒死自己。所以大人同小朋友都要小心飲食。小朋友腸胃唔同大人，未接觸過食物，驚食咁某啲嘢會敏感，又驚佢食咗唔舒服唔識講，要一步一步試。（會唔會自己試食先？）會㗎，我會自己食咗先畀佢食，唔係好似古代啲皇上咁要幫佢試下有冇毒，係要試下好唔好味，要好味先會畀佢食。」

兒子最怕食牛油果

Aimee續說：「我好鍾意食牛油果，每日要食一個，但係佢就唔鍾意食，有試過畀佢食，不過佢暫時接受唔到嗰個味道。（囝囝試過對食物敏感未？）好彩未，幸好，希望唔好。我啲朋友話如果太急畀唔同嘢食小朋友試，會有敏感，所以要慢慢試。（囝囝食粥仔未？）我有攪爛啲水果畀佢食。（會唔會唔畀其他人餵囝囝？）唔會，小朋友接觸多啲人抱佢餵佢係好事，佢嘅發展會快啲同埋無咁易驚人。」

拍劇係my love

至於何時復出拍劇？Aimee說：「快喇。Aiden依家7個月，話細唔係好細，話大又唔係大，我想打好個基礎先。（為佢推咗好多劇？）我暫時嘅focus都係放喺佢身上先。（第一部推嘅劇係《梟雄》？）有傾過但未confirm，無推，係有接觸。老實講有幾個project都有傾過，只係未係適合嘅時間，但演戲真係my love。每套劇我都唔會話推，我好鍾意演戲，不過要睇時間，唔係話carefree（無顧慮）可以即刻跳去做。」

她又透露自己患上「媽媽手」的病還未康復，仍要繼續做物理治療和針灸，要湊囝囝所以會keep住有這個問題。問到她是否要明年才可復出拍劇？據悉她因要先等丈夫陳豪拍完劇接捧湊仔。她說：「我諗都係，要有一個喺屋企照顧Aiden，對佢發展會好啲。（要同老公度期？）係。」