宣萱喪讚意大利男友　帶埋見家長

藝人宣萱盛裝現身九龍塘，出席以動物為主題的電影慈善優先場。問到蜜運中的她為何不攜眷出席？她說：「佢都聽唔明，佢份人又低調。不過佢都想支持，因為佢都鍾意小動物。佢之後會放暑假返意大利。（跟佢返去？）唔會，我地拍咗唔耐拖，慢慢嚟。（睇定男友未？）睇人起碼睇一年半載啦！」

父母放棄催婚

問她給男友評多少分？她即sweet爆大讚外籍男友謂：「我都畀幾高分佢。（幾多分？）你過多半年再問我！不過我欣賞佢份人有耐性同隨和。」她又自爆已帶男友見家長：「我哋之前食飯見到梁家樹，佢用爸爸眼光望我男友，不過冇評語。（見家長？）同父母食過飯。（父母催婚？）佢哋放棄咗，佢哋以前想我結婚，依家想抱孫多啲！」

談到生B，宣萱直言想至少生兩個，但又自嘲趕唔切生：「遇啱人都想生，但世界好亂，出世後佢要面對好多嘢，最好生多一個，等佢有個伴。不過趕唔切，唔諗住，要對象100%啱先得！」