馬賽三度爆喊　透露仲有片

藝員馬賽跳艷舞調情片段流出後，她返到將軍澳電視城見高層樂易玲「照肺」後由企業傳訊部副總監曾醒明陪伴見記者，馬賽被無綫無限期停工，馬賽受訪時三度爆喊。

曾經好麻木咁信任一個人

問馬賽的艷舞片是甚麼時候拍？她說：「條片係舊年拍嘅，已經過咗一段嘅長嘅時間，已經報咗警，今日重案組已經上咗我屋企落口供，我將最詳細嘅資料同情況都交咗畀警方，所以可能有啲details唔方便喺度同大家講。（片係自拍定人哋幫你拍？）唔係我拍嘅，我亦從來冇copy，警方會幫到我去調查究竟段片係點樣嚟。（邊個拍？）佢當然係我曾經非常之親密嘅人，好似我聲明入面講曾經好麻木咁信任一個人，我相信好多人喺愛情入面都係好麻木。其實係有好多事可以引而為鑑，當你好投入一段感情，你永遠會覺得依啲事唔會發生喺我身上，我依家知道只有你自己可以保護自己，所以女仔真係千祈唔好影啲咁嘅相或者片。」

承認唔止拍過一條片

問到是否不止一條片，馬賽說：「其實真係唔知，無論點都要堅強咁去面對，係好難嘅。（咁即係有冇其他片？你自己影過應該自己知）應該仲有。其實依啲都係我好私人嘅嘢，希望大家允許我唔答依個問題。」之後她續說：「我知道咩人有（啲片）嘅，我依家可以做嘅係平復吓自己心情啦。（片係汪子琦拍？）好私人嘅嘢，我唔想依度講某一個人，最真實嘅資料我已經畀咗警方。（汪子琦同Laura都否認係佢哋放條片，咁佢哋有冇講大話？）我知道條片係邊個，亦都知道邊個有依條片，究竟邊個放出嚟，或者咩途經放出嚟，要留畀警方查證。（但係汪子琦話佢係收到你發畀佢嘅片同埋照。）佢講嘅嘢，我唔回應啦。依啲片唔係我自己拍嘅，我都冇保存過。（你有冇曾經傳過片畀佢？）依啲係好個人嘅嘢，希望你可以畀我唔答啦。依啲嘢係令我非常之堅強，我今日可以坐喺度，同埋好感恩好多人鼓勵我支持我，感到好多嘅愛，依啲片點解要流出嚟，人哋點諗我唔知，我要堅強面對，我要負責任，承擔後果，畀屋企人一個交待。」