林峯超市做阿四　千語撒嬌冧番

近期常離港工作的林峯，與女友吳千語拍拖到中環超市掃貨，出名錫女友的林峯推購物車擒高擒低、擔擔抬抬，做「阿四」仲笑騎騎。

戴帽及黑超的林峯，進入超市即「自動波」推住購物車四處選購，兩人睇完零食、又睇調味料，不一會已揀購了大堆食品。行經乾糧貨架，千語BB睇中貨架底層食品，林峯二話不說便踎低揀，而千語BB則從旁指指點點，之後搭下男友膊頭撒嬌，冧得林峯笑到四萬咁口。

林峯搬搬抬抬千語手揈揈

其後兩人又去廚具部，最後買了即食麵、杯麵、餅乾及調味料等兩大籃貨品往排隊付款，林峯當然負責埋單，更做埋阿四攞戰利品，然後搭升降機往停車場取車，兩人見到記者拍照即笑笑口打招呼，而手揈揈的千語BB臨走前還向記者揮手道別。