仔仔騷擾講是非　楊千嬅喝住嗌No

歌手楊千嬅及王菀之出席電影《分手100次》慰勞宴，千嬅日前被拍得與兒子Torres在下午茶期間教訓仔仔，她對此回應說：「我同朋友Tea緊，Torres跌嘢，想引人注意，我同人講緊是非㗎嘛，咪叫佢：『No，Torres』嗰刻我覺得自己身處外國，男仔係要咁對佢，否則佢唔會聽。（好聽你話？）佢有時會扮唔識聽，唔知我講乜，唔畀反應我，佢笑囉！佢有興趣咪笑，不過佢算乖。好喇，講番套戲。」

客串性質的千嬅被問會否接拍續集，她說：「我今次都係撐旦哥（鄭丹瑞），佢悉心安排，造就我做軍裝警察。」

王菀之大讚千嬅，她說：「千嬅段戲每個鏡頭都好好笑，又感人。（旦哥續集預你？）多謝呀！但我呢次放低咗錢嘉樂喇，期待續集有新戀情。（想同錢小豪定旦哥？）同張繼聰，佢今次出咗幾個鏡頭咋！」