郭晉安揀錯輪椅險爆頭

藝人郭晉安（安仔）日前於無綫新劇《忠奸人》中飾演雙腳癱瘓的奸險大狀，相隔七年再演奸角的他自認靠純良樣貌「食糊」：「就係我個樣生得純品，監製先會搵我做反派，咁先呃到全世界！」劇中以輪椅代步的他自爆「烏龍」揀錯花式輪椅而險些撞爆頭：「我諗住最醒就係揀最輕巧的輪椅，點知係花式用嘅（受傷？）冇，不過試過一心急就用力過猛，差點反車撼爆頭！」

安仔自爆以輪椅代步時用錯力，令雙手麻痺：「我醫咗兩個月，搵咗三個醫生。（老婆歐倩怡擔心？）係！針灸同啪骨後有好轉。」問他坐輪椅演戲有礙發揮演技？他說：「反而製造到浪漫位，我會用輪椅載埋阿田（田蕊妮）周街玩！」談到搭檔阿田，他大爆難忘背足十八頁對白為對方打官司：「我背咗八日，場戲拍到凌晨三點，背到條脷都打晒結！」