鍾嘉欣現身拯救「濕晒」汪阿姐

無綫花旦鍾嘉欣和汪明荃（阿姐）現身太子街頭，為新劇《華麗轉身》拍攝落雨戲，劇情講述飾演大明星的阿姐，不慎遺留手袋在影樓，冇手機又冇銀包在身的她，在街上留連搵人求救，豈料突然下大雨，扮演其助手的嘉欣及時現身，拯救徬徨無助「淋濕晒」的阿姐。

首次與阿姐合作的嘉欣，大讚前輩阿姐好好人：「今次我哋好多戲份，好感恩可以同佢合作，佢係好令人尊敬嘅藝人，之前我話眨下眼做咗１０年，阿姐話做咗４７年，佢喺娛樂圈貢獻咗自己一生。」問到對方是否很嚴肅？她否認道：「佢好caring、好有心，每次見到啲女仔拍完外景返嚟，佢都會煲啲湯水、涼茶畀我哋飲，即使好重都會拎幾壺返嚟，我覺得好幸福，因為自己一個人喺香港，平時都冇湯水飲。」

她又指拍攝時更不時獲對方提點。至於阿姐則大讚嘉欣好smart，並謂最難是與當日的童星拍戲。問到現實中有否試過不見錢和手機？她說：「我只係試過跌爛咗部手機，結果要即刻買返部，搞到要搵人借電話。」今次有否出動私伙拍攝？戴上珍珠大耳環的阿姐笑謂：「少少啦。（珠寶？）依家邊有人戴珠寶出街架，我呢隻耳環假架，多數人都戴人造首飾。」