林泳淘祈望早婚趕絕是非男

個性開朗的無綫女藝員林泳淘自小已是學校風頭躉，表演欲爆燈，入行第一關便是擔任外景主持訓練口才，鬼主意多多的她亦希望嘗試拍劇，並自薦扮演奇怪角色，例如被動物或男士上身，一於靠另類突圍！

無綫女藝員林泳淘終日掛着甜美笑容兼擁有精靈雙眸，親和力十足，外貌與胡杏兒、楊愛瑾及楊秀惠屬「同一系列」的她，前年參選港姐時一度成為熱門，年初與同期港姐陳潔玲拍攝旅遊節目《情迷越南》時，她以一襲火辣泳衣大晒身材，旋即迷倒大批宅男，人氣急升！

興趣甚多的泳淘跳跳紮冇時停，獲派擔任《東張西望》外景主持可謂非常適合，她亦視之為寶貴經驗，為將來事業磨刀：「做外景學到好多做節目嘅技巧，首先係練咬字，入行之前我係懶音王，依家注意咗，見到咩都讀一餐，改善咗好多。另外係對鏡頭嘅敏感度，對將來演出都有幫助。」甚少拍劇的她亦渴望一試演技，問到最想演甚麼？鬼主意多多的她即發揮創意，笑言最想演繹另類角色，例如扮被動物或男士上身：「古怪啲就最啱我，唔好咁正路，有啲電影題材係隻貓變咗做人，好多朋友話我性格似貓，應該幾適合我演！我又幾男仔頭，可以做啲Man啲嘅角色，之前上功夫堂，老師話我有潛質，做打女吊威吔都好呀！」不過，泳淘笑言未能接受自己的古裝扮相，自嘲太有現代感，扮楚楚可憐有難度：「之前拍《愛．回家》有一集戲，我扮好有吸引力嘅女仔，講嘢好斯文，惟有出動港姐儀態。」

自嘲男仔頭

求學時期的泳淘已是活躍分子，幾乎參加所有課外活動，包括跳舞、唱歌、田徑及舞獅等，加上贏過校花，自然吸引大批裙下之臣，但她自嘲性格男仔頭，最怕被煩，初中時對拍拖完全沒有憧憬：「我細個比較活喺自己世界，鍾意同朋友玩，可能有人暗戀我，我都唔覺，不過好記得有男仔成日打電話去我屋企，影響到家人，我好唔鍾意咁。」只拍過一次拖的她其實相當「傳統」，仍相信一見鍾情及希望早婚，問到擇偶條件？她說：「主要睇性格，要錫屋企人，同埋最怕男仔小器講是非，而且唔可以有選擇困難症，因為我成日出唔到主意！哈哈！」

活躍老竇帶追風

泳淘擁有一名超活躍爸爸，曾帶她與家姐、細佬半夜跑山及體驗十號風球的威力：「爹哋會半夜帶我哋行山爬樹，搞到成身污糟返屋企，又試過十號風球去吹風，我仲好大膽，表演跳起跟住畀風吹走！」但她笑言對游水有陰影亦是父親的帶挈：「佢帶住我游到浮台，跟住自己去咗捉蟹，突然返嚟掹我隻腳，嚇到我有心理陰影，依家都唔識游水。」與父親亦父亦友的泳淘表示，將來做媽咪亦會倣效這種教學方法。