張繼聰激咀亞男　全家熄電視罷睇

藝人張繼聰、陳凱琳（Grace）及姚子羚等，下午在金鐘高等法院拍新劇《四個女仔三個Bar》，劇中與Grace飾演情侶的張繼聰，大讚女方又定又專業，問到有否親熱戲？他說：「係含蓄啲嘅，我哋25集後先心有靈犀，唔似《忠奸人》嗰種咁physical，我哋係比較靈性啲，一日未拍完都唔知有冇吻戲。（向監製要求？）我唔做呢啲嘢。」

提到日前播出的《忠奸人》，他與王祖藍女友李亞男激咀，張繼聰笑道：「我好怕拍呢啲嘢。（太太謝安琪有冇睇？）佢話成家人坐埋一齊睇劇，仔仔睇到好入神，一到嗰啲場面我阿爸就熄電視，我外母都睇到好擔心個女嫁錯人，可能我太入目三分，成個街市都驚我係咁嘅人。」

介意老婆拍親熱戲

對於祖藍表示睇到眼火爆，他直言拍前有通知祖藍，對方也大方稱自己拍唔少吻戲，張繼聰又笑謂：「呢啲嘢有借有還，我預咗呢啲好快報應喺我身上，我都介意老婆拍親熱戲，但佢可以照拍，最多我唔睇囉！（你再還擊拍勁啲？）冤冤相報何時了呀，咁樣會害咗下一代。」

談到獲張繼聰讚賞，Grace也坦言對方很nice，也幫助她很多，兩人私下又會商討如何演得更好。問到會否介意拍親熱戲？她說：「到時有先再諗，會視乎劇情需要。」