陳展鵬被屈整容　實情凍到水腫

藝人陳展鵬出席活動，談及主演的無綫新劇《大藥坊》將於下月8日出街，他表示這個劇令他有一種特別的感覺：「我入行以嚟拍咗兩套民初劇。第一套喺隔籬台，第二套就係呢套。呢套係我喺TVB第一套民初劇。」笑言美中不足是沒有出埠拍外景：「出埠個景會靚啲，但監製話想用劇情表達多啲，用劇情搭夠。」拍此劇破了他落水的紀錄：「落咗四、五次水，由海水、淡水到湖水都有。仲要喺最凍嗰幾日拍，即係新年嗰陣。（冷親？）有，嗰排病咗，就係水腫話我整容嗰時。（咁易病？）因為拍嗰套劇好辛苦，天氣又凍又落水，三、四度都要落水。」

讚鍾嘉欣係好拍檔

問可有想過憑角色問鼎視帝？展鵬說：「攞過獎嘅人都係平常心，都要睇天時地利，不過呢套劇整體嚟講都幾好。」對於與鍾嘉欣合作而傳緋聞，他說：「唔會啦！都拍完。（會宣傳。）宣傳得一日，唔會啦！（傳第二啲？）有咩好傳！（傳不和？）無端端點會傳不和，唔會啦！佢只不過係一個好嘅同事同一個好嘅Partner。」

感謝無綫給予機會

問林峯離巢是否會有更多機會？他說：「不嬲無綫都畀好多機會新人，我唔可以話係新人喇，但今屆港姐都畀好多機會。（公司捉你簽新約？）如果公司想同我早啲傾咪傾囉，但我同公司嘅合約仲有一段時間，所以都唔會咁快傾住。」