馬賽笑住行騷 喊住開腔:好難捱都要捱落去

20140814
東網電視
更多新聞短片
馬賽「小休」20日後「復出」行騷,全程容光煥發,不過當提到艷片瘋傳一事時,她即哭成淚人,狀甚可憐。
無綫藝人馬賽自上月23日流出艷舞片及照片後,首度「復工」現身公開場合,並以密實裝束為秋冬時裝騷打頭陣及壓軸走秀,成為全場焦點。
暫無其他工作
眼有少許浮腫的馬賽明顯不上妝,她接受訪問談及心情時即向傳媒合十道歉:「搞到你哋咁辛苦,真係sorry,多謝你哋嘅關心,其實我今日好緊張,但要多謝Elaine(姚子羚)同經理人喺後台係咁鼓勵我,呢個job係一早接咗,作為藝人應該要有專業操守,所以我今日有嚟出席,自己亦會努力做好,當然我好感謝客户同公司冇因為呢件事而取消我原有工作,好感恩有呢個機會。(之後仲有冇其他工作安排?)暫時無其他job啦!」
對於有指馬賽暫遷回內地居住,她表示:「因為我父母都喺內地住,都想多啲時間陪佢哋,呢件事已經令到佢哋好擔心,影響咗好多人,屋企人、同事、朋友、敬重嘅前輩,真係好抱歉,sorry。(前輩係咪指劉松仁?)其實連累嘅人有好多,唔單止松哥。」
唔敢睇新聞
問到舊愛汪子琦指馬賽有傳艷舞片給圈中年過半百藝人,馬賽即開腔澄清說:「我喺陳辭同証供上已經講過自己冇擁有過呢啲片,亦講過冇send過畀任何人,依家警方同香港個人私隱專員公署亦調查緊呢件事,我相信香港係一個法治社會同法律係公義嘅,一定可以保護到我!(係咪好怕將自己性事公開?)自己唔敢睇任何報道同訪問,亦都叫朋友唔好畀我睇,一段錯誤嘅感情去到一個咁災難性同毀滅性嘅結果,係需要自己去承擔,最Sorry係令一班好錫我嘅人擔心。」
佛偈回應是非:萬法皆空,因果不空
問到有否對汪子琦及Laura產生恨意,馬賽未有正面回應,只說:「我淨係想用自己嘅例子同所有女性講一定要識保護自己,我已經得到一個好大嘅教訓,所以交朋友一定要慎重,要聽長輩同家人嘅說話,唔好任性。(有冇後悔識咗呢個人?)我半年前開始信佛,相信好多嘢都要認命,依家唯一就係要做好自己同面對。(係咪發生事後先信佛?)唔係呀,喺2月機緣巧合下信架。(汪子琦話係你主動跳艷舞?)我冇回應喇,我信佛,『萬法皆空,因果不空』,好多嘢唔使去尋求結果同答案,因果會畀到答案。」
唔會傷害自己:好難捱都會繼續捱落去
選擇勇敢面對的馬賽,更表示未有產生自殺念頭:「呢段時間真係好難好難捱,最難捱嘅一星期,自己冇去聽同睇任何嘢,乜都唔諗,但我知道無論發生咩事都唔可以傷害自己,因為仲有好多人痛錫同支持自己。」她還透露由今年一月開始,有看精神科醫生:「因為之前有抑鬱,呢段時間好難捱過去。(係咪繼續食緊或加重藥物?)有食幫助平復情緒嘅藥物啦。(咁係咪仲係抑鬱?)其實我冇研究過病徵,好難捱都會繼續捱落去。」
「呢大半年都係靠屋企人」
問到停工後如何負擔生活時,馬賽即強忍淚水說:「呢大半年都係靠屋企人,好感激佢哋。(咁之前指你貪汪子琦600萬?)冇回應。(咁頒咗禁制令個人係咪鬆一口氣?)我真係好感激律師團隊不眠不休咁去幫我做呢件事。(律師費自己畀?)屋企人幫我畀。(工作安排呢?)等公司安排,未知休息幾耐,呢段時間會讀course增值自己。」馬賽最後再三強調交朋友一定要有戒心:「多聽家人意見。(係咪屋企有反對過你呢段感情?)係自己任性同自以為是,依家好感激一班仲咁支持我嘅人。」