曹永廉開港式餐廳　特色小菜吸客

藝人曹永廉（阿廉）近日於觀塘自家茶餐廳接受訪問。他自爆上年與哥哥及友人夾份投資七位數字，開設港式茶餐廳。他又自認「計王」吸客：「我會成日諗下新菜式，例如整士多啤梨骨同芝麻脆炸雞翼去吸引小朋友。（回本未？）未，不過收入穩定。」他稱「心思思」與好友如蕭正楠等「齊腳」開分店：「我夠膽搞（分店）架！同佢地討論過，邊個有好路數就搞（齊腳夾錢開分店？）錢佢地不嬲有啦！」

談到與他老友鬼鬼的「太監五虎」（黎耀祥、蕭正楠、陳國邦、黃浩然），阿廉就搞笑「出賣」燥底黃浩然：「我地（拍劇）會玩到癲晒，當中有人講錯對白會畀大家窒到爆，黃浩然仲會掟嘢同打人！」而阿廉又對熱播劇集《寒山潛龍》結局收視充滿信心：「套劇行內同行外口碑都好好，相信會輕鬆取勝！」