拒收曹永廉吹氣公仔　壽星鄭嘉穎：留番自己用啦

藝人鄭嘉穎今日45歲生日，好友曹永廉好有心思咁送上驚喜，唔知係咪怕嘉穎單身寂寞，特登訂咗個吹氣公仔畀佢！曹永廉喺微博上載公仔照片，留言話：「兄弟，生日快樂！祝你好的東西繼續擁有，壞的朋友自動遠離，身體一天一天壯，銀包一天一天脹，女友多籮籮，唔會暈陀陀！訂了一個人形公仔給你做禮物，但貨未到，先睇相！」

蕭正楠爆阿廉一早收到貨

好友蕭正楠即留言祝福兼抽水：「奇怪！阿廉你明明話上星期貨到了……難道你……噢！明白了！嘉穎……祝生日快樂，人見人愛車見車載。」而胡定欣及黃浩然亦都留言送上祝福。面對曹永廉的盛情，嘉穎留言話留番畀佢自己：「多謝多謝，心意收到啦，公仔就免啦，你留番自己用啦，襯你啊『十九』！」