蔚雨芯晒魔鬼胸賀海選入40強

藝人蔚雨芯（Rainky）以超低胸長裙出席美甲活動，大騷「魔鬼胸」。Rainky透露剛從巨星周星馳於北京為新戲舉辦的《美人魚》海選趕回來撐好友場：「因為入咗40強，暫時喺北京試鏡試咗一兩日，（試鏡內容？）有關事宜同內容都唔講得住，因為簽咗保密協議，（有冇見到星爺？）日日都喺報紙見到啦！」

Rainky表示已為電影試鏡出盡渾身解數：「除咗唱歌、跳舞、演戲，仲學埋太極功夫添，今晚就會飛返去北京繼續試鏡，直至24號先完結，（試鏡要落水？）都係交畀大會決定，每日做唔同嘅Task（任務）。（見過對手未？）依家仲係單獨Casting（試鏡），未見過其餘39位對手。」

對於其中一名對手「寸嘴Barbie」夏尉喻自拍短片爭奪「星女郎」之位，Rainky表示有看過該短片：「佢好勇敢，都有同佢傾過偈，覺得佢好活潑同好搞笑，（有冇睇杜汶澤惡搞Barbie條片？）都有，覺得阿澤更加搞笑，封佢做我偶像，（你敢醜化自己拍嗎？）真係要睇角色需要同公司安排，自己就唔介意嘅，大尺度都OK！」

靠南極跳水短片入圍

她會繼續參與海選，直至最終挑選4人為止：「由20號晚開始就會有網上直播表演，一連4晚，感該24號晚就會公布賽果，（其實你最初點入圍？）我攞咗自己去南極跳水條片再加自彈自唱去參選嘅！」