黃宗澤齋飲水　為求拍出Fit爆身材

藝人黃宗澤（Bosco）最近同日籍模特兒Jun合作，拍攝美容食品平面廣告，兩人均以白色背心上陣，充滿夏日氣息。Bosco都對這個造型特別滿意：「拍出嚟個效果好Sporty，同我平日個形象好唔同。」Bosco為咗保持身形拍廣告，喺拍攝時忍口只飲清水，更爭取空檔時間喺現場狂做熱身運動，態度認真。

問到Fit爆嘅Bosco保養貼士？佢話：「做藝人經常食無定時，所以我都會食得清淡啲。」而拍攝更要求佢要跳躍100次，但Bosco一句怨言都冇，表現十分專業。面對日本拍檔，Bosco都用盡方法同佢溝通：「我會同Jun拍啲比較親密鏡頭，有少少尷尬，所以惟有用我有限嘅日文同Jun打招呼﹑傾計。」佢更表示希望可以盡地主之誼，請Jun食飯。