男神馬國明有着落 送女友返歸斷正
20140829
東網電視
更多新聞短片
馬國明在言談間非常保護新女友徐佳琦，相信他們的感情發展不錯。
被封為「男神」的馬國明（馬明）自與胡定欣分手後，感情看似未有着落，但「唐僧肉個個爭住食」，原來馬明在朋友介紹下秘戀來自上海兼貌似「千億新抱」徐子淇的寰宇小花徐佳琦。最新一期《好報》踢爆行年40的馬明終於出貨，兩個多月前結識徐佳琦，二人雖年紀相差14年，可是一見鍾情、一撻即着。
馬明與徐佳琦拍拖兩個月打得火熱，但為免戀情「見光死」，惟有愛得低調，馬明近期頻頻揸車到尖沙咀一幢舊樓附近接載徐佳琦，徐佳琦正正居於舊唐樓的劏房。據《好報》報道，本月17日徐佳琦悉心打扮會情郎，穿上一襲碎花短裙的她從寓所步出，先會合一名據知是馬明家人的女友人，二人步入附近一間商場Shopping，徐佳琦全程心不在焉，猛篤電話，又不時補妝Chok靚個樣，似心急等待與馬明的約會。
不消半小時，馬明座駕駛到商場門口，司機並非馬明，相信是他委派「護花二人組」，車女友過海到其太古城寓所附近開餐。夜幕低垂，馬明的家人見晚飯過後即醒目離開，讓馬明和徐佳琦過二人世界，浪漫直到深夜。
一對小情人雖然正值熱戀期，但絕少玩「宿一宵」，當晚馬明一如以往，車女友返回尖沙咀香閨，記者上前拍照，二人同車當場斷正！此時見鎂光燈猛閃，二人如驚弓之鳥誠惶誠恐，不約而同露出一副愕然表情，馬明更變成「騰雞明」，一時手指指，一時又變「天然呆」，一時又嘟嘴不知所措，為免女友被嚇親，又不時望實掩面的徐佳琦，又打手勢着記者不要再影！
馬明其後踩油圖撇記者，先後帶記者在尖沙咀、何文田及旺角遊花園，再過海到大坑，但未能撇甩採訪車，他惟有鼓起勇氣做男人該做的事，停車面對記者，記者上前問徐佳琦是否其女友及為何要迴避？馬明沒有回答，再問是否與女友出街？在旁的徐佳琦尷尬地擰頭，不停撥弄頭髮，然後馬明落車，扮鎮定除下眼鏡狂抹，一人獨自面對記者提問。
馬：馬國明 記：記者
記：你女友？
馬：呢個女仔係朋友介紹認識，今日係4個人一齊去食飯，食完就車兩個朋友返屋企，我就再車佢返屋企。
記：點解你哋要走？
馬：（顯得護花心切）佢真係好驚，你哋真係嚇親佢，佢係咁叫我開車。
記：你哋識咗幾耐？
馬：（口窒窒）啱啱呢排識，係朋友介紹。
記：有發展空間？
馬：你哋依家嚇親佢，真係唔知喇！
記：公開會唔會好啲呀？
馬：er......你哋嚇到佢咁，佢頭先真係好驚，你哋突然閃出嚟，真係嚇親佢！
記：你哋會去邊？
馬：想送佢返屋企，我哋都係第二次出街，你哋頭先都影到其他人一齊架！
記：不如一齊影張相？
馬：你哋真係嚇親佢（連講三次）！不如下次有機會先再影啦！
冇癮送女友返歸
說畢，馬明返回座駕車女友返尖沙咀寓所，然後又揸車折返太古城，為保愛苗來回港九幾次，踩油都踩到腳軟，東窗事發，馬明出入明顯格外謹慎，翌日從尖沙咀返電視城開工，即使女友不在身邊也不時遊目四顧，看清楚有否被記者追訪。