被打彈飛數米唔誇張　林峯：娛樂大家

林峯、佘詩曼及苗僑偉為新劇 《使徒行者》現身將軍澳中心谷劇，率先換季的林峯一身冬裝，他說：「啱啱去完東京、大阪，置咗新一季衫，要追貼秋冬。（吳千語都有去？）有，我哋都係去周圍食嘢，好彩冇肥太多，旅程中都有香港遊客想影相，但我話唔好意思，佢哋都好Nice。」

有親熱鏡頭必備案

阿峯又自爆拍攝親熱鏡頭時，有向千語備案，他說：「個劇間中有啲場口飛紙仔，仲有少少親熱戲，我都遲咗報案，要講Sorry！（咁嚴？）要嘅，佢拍嘅時候都有同我講聲，互相尊重，增加透明度，Honest （誠實），大家理解嘅。」

誇張為娛樂大家

提到昨晚播出他被打後，彈飛數米的鏡頭，被網友大肆討論，林峯說：「拍嘅時候係我自己起跳，戲劇效果需要。（唔驚人話誇張？）套劇都係娛樂大家啫！（有網友cap個劇嘅圖，話你下身有過人之處？）我諗係條褲嘅布料啫，角度問題，但無論觀眾以咩心態睇呢個劇，都期待佢哋會覺得個劇緊湊，有追看性。」

未落實簽約新公司

他又重申現時仍未落實簽約新公司，他說：「你睇我啱啱都出埠鬆一鬆，遲吓再約啲公司傾吓條款，總之有消息一定同大家講。（內地劇《衞子夫》反應好，想再叫高啲價？）我一向都鍾意接受新挑戰，類似嘅角色我未演過，所以有好反應，有傳我簽浙江衞視，事實係一切都未定。」