邵珮詩摘冠：尊重大會決定

出爐港姐邵珮詩、王卓淇及何艷娟，下午喺電視城會見傳媒，三人均表示興奮到瞓唔着，冠軍邵珮詩稱尋晚飲咗媽咪嘅愛心湯及一件蛋糕，不過當選後要繼續保持身形，而有「自信王」之稱嘅亞軍王卓淇，自言食極唔生肉，故一向唔使keep fit。

有傳未公布三甲，TVB fun app已剩三位佳麗畀人投票，令人質疑有結果內定，季軍何艷娟認為唔會，皆因Day 1已知賽際，佢哋又指係一人一票，實至名歸，都相信評判眼光。講到司儀們得悉賽果O哂嘴，王卓淇話：「阿叻（陳百祥）、大師兄（錢嘉樂）都支持我，各花入各眼，我唔覺得爆冷。」當記者指觀眾認為三甲冇選擇，佢即冷笑一聲，邵珮詩隨即話：「大會嘅決定，我哋會尊重。」

提到（11）吳凱欣民選票數最高，網友稱佢應該摘冠，問有否感到唔開心？邵珮詩話：「唔會，我對自己有信心，自己表現都好好，亦得到大家應同，十個女仔都做得好好，只係有啲表現比較突出。」講到網上吳凱欣票數高過三位，王卓洪謂：「佢好有觀眾緣，知道佢今日casting，相信入行冇問題，發展一定好好。」