陳凱琳穿越古代同張保仔談情

藝人陳凱琳（Grace）在將軍澳電視城出席無綫新劇《張保仔》（暫名）試造型。她透露此劇是穿越劇，由現代穿越到清朝：「好有挑戰性！」更指11月會北上到橫店拍外景：「到時可能會好凍，但古裝有一樣嘢好就係裏面可以着多幾件衫。」而楊明會在劇中飾演其現代男友，回到清朝則會和飾演張保仔的黃浩賢有感情線：「我哋一開始就唔啱，因為我係警察，覺得賊就係賊，但之後一齊經歷咗唔同嘅事情後，就覺得海盜都有好嘅，對自己嘅人都好有愛心。」

談到與電影撞橋，Grace就指拍劇始終與拍戲有所不同：「好似福爾摩斯咁都有好多劇，美國又有，英國又有，又有電影版。角色又唔同，劇本又唔同，所以冇乜嘢撞到。」她又指劇集籌備多時，只是揀好合適的時間才拍攝。