拋胸煮住家菜　高海寧擇偶鍾情宅男

高海寧（高Ling）出席美食推廣活動，席間，穿上tube dress的她俯身炮製美食，不經意露出三吋事業線。高Ling表示平日愛煮創新菜式，笑言細佬是其御用白老鼠，又自稱將來應該留得住男友或老公的胃：「以前有整過蛋糕、甜品畀男友食，入行後有向師傅學唔同國家菜式，希望將來搵到個鍾意煮嘢食嘅男仔，大家一齊研究吓，不過都要佢洗埋碗。」

食完又減

她又指平日會邊煮邊試味，食完便做運動keep fit，並自嘲黐家是個宅女：「我人生樂趣係留喺屋企食嘢、睇書、聽音樂，所以到依家都識唔到男仔，公司又搵唔到。（睇唔上眼？）身邊啲對手都係高質素嘅筍盤嚟㗎！（馬國明都有新歡，封晒盤啦！）係囉！好嘢都畀人搶晒，馬國明鍾意女神feel。（你都係女神！）我會搵到識欣賞我嘅男神。」

鍾情宅男

高Ling直言不介意與宅男拍拖，她說：「我唔介意對方鍾意留喺屋企，要我周圍去反而冇咁嘅精力，最好同我喜好差唔多，作家都幾好、幾有文學修養，因為最近睇咗《小時代》，入面有個作家好有型。（柯震東出返嚟都會支持？）會，每個人都有做錯嘢嘅時候，最重要係知錯能改。」