陳智燊同宋熙年口吻一致　唔會奉子成婚

藝人陳智燊（Jason）出席新劇《水髮胭脂》煞科宴，提到早前與宋熙年公開戀情，問到兩人是否好事近？他笑說：「未有咁快要工作先，我哋都穩定咗，所以會以結婚為目標，依家儲錢買樓。（計劃幾時？）至少一年後，四年內，如果突然好想結婚，撞到時間啱都唔排除。（奉子成婚？）會先結婚，希望照計劃進行。」Jason又表示雙方有默契，女友也未有急於催婚，不過坦言父母恨抱孫，問到是否已見家長？他說：「係呀，但唔係刻意，之前都見過佢媽咪，對我印象都okay，因為我冇唔好習慣，熙年都見過我父母，媽咪都冇乜挑剔，媽咪要嘅嘢佢都有，仲畀80分佢。」