學車期間用手機拍照　G.E.M.隨時罰2,000蚊

樂壇小巨肺鄧紫棋（G.E.M.）人紅是非多，她網絡上的一舉一動都成為網民焦點，單是微博的粉絲人數已逾1,300萬人！早前她網上流出疑似艷照，以及自己上載家中開放式廚房疑似明火煮食的照片，都成了網民爭論熱話。

G.E.M.又網晒照片，「第一次」上載一張在汽車駕駛座拍下的照片，留言：「下雨天，第一次在馬路上開車，心如鹿撞，哈哈哈哈！」隨即再惹網民熱論，擁逾3萬個讚好及近1萬個留言，惟有網友質疑G.E.M.揸車時使用手提電話疑似違法：「請問在路邊開車可以邊開邊拍照？視他人安全不顧，這樣是違規嗎？」亦有不少粉絲擔心G.E.M.的安全：「睇路呀！唔好顧住影相！」

得教車師傅允許下拍照

對於網友質疑，《東網》立即致電G.E.M.，她表示當時正學車，在停車等待轉車及教車師傅允許下才拍照：「我影嗰張相嘅時候停喺紅燈，咁嗰陣時我學緊車，咁我個阿Sir就坐喺隔離，咁我問佢話依家紅燈咁我哋又唔開車，我可唔可以影一張相，佢話可以，我先至影咗。」

G.E.M.又表示曾在運輸署網頁查閱過，認為自己未有違反交通規則，她說：「同埋上埋運輸署個網頁，睇番其實佢係有講到，第五條：如司機在其所駕駛的車輛停紅燈時、塞車停下時或停泊在路邊時以手持方式使用手提式流動電話，會否違反新法例？第五條嘅答案係不會，因為新法例只適用於當車輛行駛時。所以其實我係冇違反交通規則囉。」

停車熄匙後才可用電話

《東網》再致電梁永鏗律師，問G.E.M.表示得到教車師傅允許下才拍照？梁律師說：「師傅未必熟悉法律條例，佢話可以都唔代表冇犯法。」至於G.E.M.表示運輸署網頁，駕駛汽車安全指引中「常見問題的答覆」的第五條？梁律師表示其實存有灰色地帶：「唔影響駕駛之下係可以用（電話），但喺紅燈時架車未完全熄晒，架車係隨時可以郁得番，喺咁嘅情況下，你拎部電話出嚟用甚至影相，都係隨時違反法例，最高刑罰罰款2,000蚊。」最後，梁律師建議如要使用電話或拍攝，始終都是將車停泊好後再熄匙，最為安全。