蔡思貝單挑視后楊怡喪溝羅仲謙

娛圈代有姣精出，新一代姣精非上屆港姐亞軍蔡思貝莫屬！最新一期《好報》驚爆姣在骨子裏的蔡思貝，連視后楊怡的巨胸男友羅仲謙都唔放過！

貴為上屆港姐亞軍的蔡思貝出道一年已緋聞多多，近日更「染指」被視后楊怡「私有化」的羅仲謙，德國長大的她果然鬼妹仔性格！據知為成功冧掂巨胸男神謙謙，蔡思貝將姣功發揮得極致。眾所周知，謙謙早已是楊怡男友，蔡思貝因拍新劇《衝線》與謙謙近水樓台朝夕相對，加上向來鍾情大隻運動型男，據知早已心動的她，曾向身邊好友透露「嗒硬」謙謙，知情人士說：「佢明知羅仲謙有楊怡咁大個視后女友棟喺度，一樣當楊怡冇到，有好多人都勸過佢唔好玩火，但佢好似當耳邊風，會聽咩？」

《衝》劇劇組人員透露，每當謙謙不在場，蔡思貝未埋位時總是沒精打彩，但謙謙一到即時上電，嗲聲嗲氣又不時向謙謙拋媚眼，起初謙謙都刻意迴避，但蔡思貝相當主動，經常借故等謙謙收工，又深宵約對方宵夜，謙謙最終盛情難卻赴會，而楊怡更收到風蔡思貝姣溝謙謙，唔慌就假！知情人士又指蔡思貝行為如同「搶劫」，令劇組不少人都看不過眼，寸她姣爆：「佢咁明目張膽，同強搶冇分別！初初羅仲謙都有定力，但慢慢開始受落，蔡思貝都幾大膽，希望謙仔夠定力啦！」但蔡思貝當時卻反撃：「我知呀（指謙謙跟楊怡拍拖）！但咁又點？又未結婚，就算係又點先？」

日前蔡思貝與謙謙、沈震軒、溫家偉及周志文於欣澳拍外景，五人穿上專業單車戰衣拍踩單車戲份，眾人先拍攝準備出發比賽的群戲，蔡思貝發現記者前，在鏡頭前後都顯得十分開心，即使沈震軒擰轉頭與謙謙、溫家偉等吹水，蔡思貝亦唔執輸陪笑，在遠處亦能聽到其大笑聲。但發現有記者探班後，蔡思貝即黑面，拍戲期間勉強交戲擠出笑容，反應明顯不及之前熱情，一邊左顧右盼留意記者，一邊追蹤謙謙的位置。

等埋位時，蔡思貝因記者在場刻意迴避，未有圍埋男演員堆，並借意捉實同劇的奀星陳婉婷在帳篷下休息，謙謙等則坐在石壆上吹水，蔡思貝明顯悶悶不樂，受訪時，問到是否身體不適而木無表情？她只說：「唔係，我靜啲啫！」提到緋聞纏身有否令她不開心？她說：「都有，咁呢套劇得我一個女仔，唔通唔同佢哋（指羅仲謙、周志文等同劇演員）講嘢咩！今次拍劇好開心，大家都好夾，後生仔女快熟絡！」而對謙謙情有獨鍾的她，一提起對方即大讚：「佢好Nice，多嘢講，好快就混熟！」再問她是否覺得人紅是非多？她說：「係紅就好啦！」另一邊廂的謙謙亦不避嫌拿蔡思貝開玩笑，問他演員中哪位踩單車最差？他說：「思貝囉！女仔吖嘛！不過佢其實都踩得幾好！」當謙謙拍踩單車戲份時，毋須埋位的蔡思貝就站在一旁打氣，不時大叫加油，但係當謙謙愈踩愈遠時，她又突然靜哂拉筋打發時間，又坐在草地上掟石解悶。

拍攝踩單車群戲外，謙謙日前再與蔡思貝及沈震軒轉到中環開工。現場所見，蔡思貝仍十分留意謙謙的一舉一動，反觀對於曾傳緋聞的沈震軒卻表現冷淡。

謙謙透露劇中獲蔡思貝暗戀，問到有否親熱戲？他說：「冇，淨係擁抱、拖手，蜻蜓點水（吻戲）都欠奉，我哋套劇好青春，激吻、床戲都唔會有。（覺得蔡思貝點？）非常聰明，佢依家拍咗三套劇，思想、態度都好似啲人拍咗五、六年戲咁，我對佢好高評價。」另一日只剩蔡思貝與沈震軒開工，未知是否謙謙不在場，蔡思貝顯得神不守舍，繼續受她冷落的沈震軒則與劇組人員傾得手舞足蹈。

至於謙謙日前摸黑拍攝一場街頭戲後，與溫家偉等全男班往飲嘢，發現鏡頭時大方打招呼，期間未見蔡思貝蹤影。據知，蔡思貝與謙謙將會赴台北拍攝外景，增加相處機會，楊怡到時真係有得震冇得瞓！