Jessica@少女時代晒韓式冧招搞到粉絲喪叫

韓國人氣女團少女時代成員Jessica來港出席時裝品牌活動，由於同場還有謝霆鋒及大陸人氣男歌手張杰任嘉賓，吸引近千名粉絲及途人圍觀，場面墟冚。

Jessica甫抵達會場即惹來粉絲瘋狂尖叫，一身Bling Bling短裙打扮的她表現興奮，熱情地向來賓打招呼。問此行感受？她說：「好開心可以嚟，好多謝品牌邀請我，每次嚟香港我都好享受。」問遇到眾多熱情粉絲是否好緊張？她立即揮手與四周粉絲問好，而粉絲亦以尖叫作回應，Jessica說：「香港啲粉絲好熱情，希望可以多啲嚟香港，最好可以用私人性質同粉絲見面。（今次逗留幾耐？）聽日就要去大陸開工，所以唔可以留得耐。」

翻譯終止問李炳憲緋聞

談及謝霆鋒，Jessica說：「我哋係好好嘅朋友，希望將來有機會合作。（你覺得佢點？）佢好好人，好Gentlemen。（你哋識咗好耐？）都識咗一段時間。（知唔知Ladies' Code成員因車禍離世？）知道，聽到呢單新聞好唔開心，希望佢嘅屋企人同粉絲唔好太傷心，大家為佢哋祈禱。」

而當問到可有留意李炳憲的緋聞時，身旁的翻譯即時終止訪問。Jessica由拍照到完成訪問整個過程逗留了約5分鐘。