蝕錢都殺　洪永城執黃浩然二攤嗌有賺

患上「貝賽特氏症」的黃浩然正於醫院休養，新劇《張保仔》角色結果由另一小生洪永城（Tony）頂替。一身戲服的Tony現身電視城開工，透露前日接獲高層曾勵珍通知：「本身我冇劇喺身，只係攞咗假同個紐西蘭朋友去旅行。（但揀中你）其實公司都好多人，可能我身上有張保仔特質，公司都好好，等我完成個廣告拍攝先剃頭，呢套劇又大製作，喺個廠度搭咗個特效景。」Tony指現正努力刨劇本，待月中才正式投入拍攝，稍後會隨大隊到橫店取景，他笑謂：「預咗呢4個月斷六親。」

望與陳凱琳擦出火花

談到今次與同受公司力捧的陳凱琳（Grace）對手戲多，Tony坦言前輩們均大讚Grace表現不錯，望二人齊齊加油擦出火花。對於為了新劇犧牲假期，Tony表示冇所謂：「我都係蝕咗張機票同酒店錢，但難得個角色有挑戰性，對我嚟講賺咗。」監製梁材遠則表示，會密切留意浩然的康復進展，並大讚頂替的Tony為人樂觀又專業。他又指Tony浩然氣質有少許不同，故稍後會為此作出調節，更指浩然已拍好的部份要重拍。

岑麗香送祝福

而曾與黃浩然合作過的岑麗香，亦向浩然送上慰問：「雖然唔熟，但都望佢早日康復。（有冇試過拍劇辛苦到病？）暫時冇，因為每次拍完劇都好想返加拿大，叉完電返嚟就會ok。」