吳母恨抱孫　吳卓羲慨嘆「有心無力」

藝人吳卓羲（Ron）日前現身電視城拍攝無綫新劇《梟雄》，劇接劇的他大呻無暇拍拖，更大爆媽媽心急抱孫：「媽咪問過我有冇諗過生仔，我當然有諗過生，可能會閃婚添！媽咪笑住話過想抱孫，因為我係唯一嘅男丁。」接著他竟自爆拍拖「有心無力」：「我做嘢忙到『有心無力』（無體力？）唔係身體上，係冇時間識女仔呀！（叫朋友介紹？）佢哋啲朋友都有另一半啦！」他大爆將到內地拍劇「掘金」：「未傾好細節，係內地愛情時裝劇。（對手？）邊個都得，最緊要專業！（酬勞？）梗係好滿意啦！」

Ron又自爆為人孝順，會「度期」陪家人過節：「我單身冇得喺中秋節『人月兩團圓』，不過大時大節都一定會抽時間留喺香港陪屋企人。始終屋企得一個，以前錯過好多同屋企人過嘅節日，依家可以『度期』控制吓時間，陪多啲佢哋！」